Փարիզն օգտագործում է Երևանին որպես սեփական կոնյունկտուրային նպատակներին հասնելու գործիք և չի առաջնորդվում Հայաստանի ու հայ ժողովրդի շահերով։ Այս մասին այսօր ճեպազրույցում հայտարարել է ՌԴ ԱԳՆ պաշտոնական ներկայացուցիչ Մարիա Զախարովան՝ մեկնաբանելով Ֆրանսիայի իշխանությունների գործողությունները՝ զինելու Ուկրաինային, իսկ այժմ արդեն՝ Հայաստանին։

 «Սա բնորոշ է Փարիզի քաղաքականությանը՝ լինել ամենուր և ոչ մի պատասխանատվություն չկրել: Նրանք միլիոն հնարավորություններ ունեին  հակամարտությունները լուծելու համար, դրանցից մեկն էլ նույն Մինսկի համաձայնագրերն էին: Հետո մենք իմացանք, որ դա եղել է սոսկ շղարշ»,- ասել է Զախարովան:

Անդրադառնալով կովկասյան տարածաշրջանին՝ Զախարովան ընդգծել է, որ կա խաղաղության ծրագիր, իրավիճակի կարգավորման քայլ առ քայլ ճանապարհային քարտեզ, տնտեսական և հումանիտար հնարավորությունների բացում, տրանսպորտային լոգիստիկայի կառուցում, և այդ ամենը ներառված է Երևանի, Բաքվի և Մոսկվայի կողմից ձեռք բերված համապատասխան պայմանավորվածություններում։

Զախարովան կարծում է, որ Փարիզի հռետորաբանությունն ուղղված է ոչ թե խաղաղ կարգավորմանը, այլ հակամարտության պոտենցիալը բորբոքելուն։ Միաժամանակ նա վստահ է, որ Ֆրանսիայի իշխանությունները դրանից հետո պատասխանատվություն չեն կրի, և կտառապեն խաղաղ մարդիկ։